ВО ШВЕДСКА Е НЕЗАКОНСКИ ДА ГО ОСТАВИШ ТВОЕТО КУЧЕ САМО ПОВЕЌЕ ОД 6 ЧАСА!

foto/Think Nordic

Сè повеќе сопственици на миленици низ Европа се соочуваат со прашањето: колку време е во ред кучето да остане само дома? Според шведските закони – не повеќе од шест часа. Сè над ова се смета за неприфатливо и штетно за добросостојбата на животното.

Во Данска, каде засега таква регулатива не постои, експертите предупредуваат дека многу кучиња страдаат додека се сами. „Кучето, пред сè, сака да биде со своето стадо – односно сопственикот. Самотијата е неприродна за нив“, објаснува Јенс Јокумсен од организацијата „Заштита на животни Данска“.

Иако дел од кучињата може да се навикнат на неколку часа самотија, над шест часа веќе претставува ризик за нивното ментално здравје. Истражувањата покажуваат дека по толкав период без присуство на сопственик, тие покажуваат знаци на вознемиреност, анксиозност, па дури и депресија.

Особено алармантно е тоа што многу сопственици дури не се ни свесни за страдањето на своето милениче. „Без поставена камера, не знаете што се случува. Некои кучиња лаат, некои вандализираат, а некои само тивко лежат и гледаат во вратата – парализирани од страв.“

Пандемијата дополнително го влоши проблемот. Многу луѓе земале кучиња додека биле постојано дома, но не ги научиле да бидат сами. Кога животот се врати во нормала, се зголеми бројот на напуштени миленици.

Шведскиот модел може да биде пример за другите земји. Не само со ограничување на времето што кучето може да го помине само, туку и со стимулирање на компании да дозволат миленици на работното место или со флексибилни работни распореди за доброто на четириножните членови на семејството.

Рутината, грижата и свесноста се клучни. А ако прашате едно шведско куче – шест часа се сосема доволни.