Поранешни директори на Онкологија обвинети за милионски криминал со лекови – државата оштетена за 36 милиони евра!

Судот го прифати обвинението – фиктивни тендери, исчезнати терапии и опасни грешки кај пациенти!

фото:принтскрин/беттѕ

Кривичниот суд во Скопје го потврди обвинението против поранешните директори на Клиниката за онкологија, Нино Васев и Нахад Нухи, кои се соочуваат со тешки обвиненија за злоупотреба на службена положба, измама и проневера во вредност од неверојатни 36 милиони евра.

Според истрагата, во периодот 2018–2022 година, преку сомнителни тендери и незаконски набавки на лекови, двајцата директори го нарушиле здравствениот систем и направиле огромна финансиска штета. Лековите често се испорачувале без тендер, па потоа фиктивно се „легализирале“ со договори, додека дел од терапиите – во вредност од 2 милиони денари – никогаш не завршиле кај пациентите.

Особено алармантно е тоа што Васев се товари за присвојување скапи лекови како Херцептин, Авастин и Ербитукс, во вредност од најмалку 13 милиони денари, кои се користат во третманот на малигни заболувања.

Но скандалот не застанува тука: во одвоено обвинение, Васев и тројца лекари се обвинети за нанесување штета на здравјето на 29 пациенти преку погрешни терапии или дозирања што биле спротивни на медицинските протоколи – со трајни последици по нивното здравје.

Првото рочиште за случајот „Онкологија“ беше закажано за 11 јули, но е одложено за 5 септември поради отсуство на една обвинета. Обвинителството го најавува случајот како преседан во борбата за одговорност и транспарентност во здравството.

БОНУС ВИДЕО: