Катастрофални пожари во Грција: Крит и предградијата на Атина во пекол, илјадници во бегство!

Грција повторно се соочува со сериозна закана од шумски пожари, кои го зафатија островот Крит и атинското предградие Пикерми, предизвикувајќи масовни евакуации и вонредна состојба.

фото:принтскрин/пихес

Пожарот на Крит, особено во областа Иерапетра, уништи маслинови насади, шуми, куќи и туристички објекти. Над 230 пожарникари, 46 возила и 10 воздушни единици се борат со огнот, а повеќе од 1.000 граѓани и туристи се евакуирани, некои од нив сместени на стадиони и хотели во побезбедни региони на островот. Хотелските асоцијации пријавуваат дека вкупно околу 5.000 туристи се принудени да го напуштат регионот, што отвора сериозни прашања за текот на туристичката сезона.

Во меѓувреме, во Пикерми, пожарот се прошири опасно блиску до главниот град Атина и меѓународниот аеродром. Густи облаци чад го прекрија небото, а властите наложија евакуација на три населени места и го затворија автопатот што води кон градот. Силниот ветер и високите температури го прават гаснењето скоро невозможно.

Кризата не завршува тука – слични пожари избувнаа и во западна Турција, во областа Чешме и Одемиш, каде исто така илјадници луѓе се во бегство. Во Италија се активирани црвени метео-аларми за 18 градови, со температури до 38°C, додека Швајцарија привремено ја затвори нуклеарната централа „Безнау“ поради прегреани реки.