ДАНСКАТА ПЕНЗИСКА ДРАМА: ЅВЕЗДИТЕ ПРОТИВ РАБОТА ДО 70 ГОДИНИ!

фото/ Интерраилл

Новата пензиска реформа во Данска предизвикува поделени реакции кај граѓаните, додека експертите предупредуваат на долгорочни последици.

Кирстен Еванс, 53-годишна банкарска службеничка, ќе мора да чека до 70-годишна возраст за да добие полна пензија. Но, таа планира да се пензионира порано – на 65 или 66 години – и покрај тоа што ќе добие намален износ.

– Мислам дека на 70 години веќе сте стари. Сакате да имате квалитетен живот по пензионирањето – изјави таа за АФП.

Според новиот закон, старосната граница за пензионирање ќе се усогласува со очекуваниот животен век и ќе се ревидира на секои пет години. До 2030 година таа ќе се зголеми на 68 години, а до 2035 – на 69. Сите родени по 31 декември 1970 година ќе мора да чекаат до 70 години за пензија.

Иако официјалната граница во 2022 година била 67 години, просечната возраст при пензионирање изнесувала околу 64 години, покажуваат податоците на ОЕЦД.

Аске Јул Ласен, етнолог од Универзитетот во Копенхаген, објаснува дека околу 20 проценти од луѓето се пензионираат порано поради здравствени проблеми или затоа што не можат да најдат работа.

– За тие 20 проценти, секое ново зголемување на старосната граница има сериозни последици – вели тој, додавајќи дека со возраста расте и социјалната нееднаквост.

Дамун Ашурнија, економист од Данската синдикална конфедерација, предупредува дека ќе се продлабочи јазот меѓу оние кои можат да си дозволат порано пензионирање и оние кои мораат да продолжат да работат.

Камила Расмусен, медицинска сестра од Копенхаген, вели дека не гледа како физички би можела да работи до 70 години.

– Тоа би било премногу. Секој ден правам околу 10.000 чекори. Ако на 70 години сè уште работам, тоа не би било фер ниту за мене, ниту за пациентите – изјави таа.

Данскиот пензиски систем се состои од универзална јавна пензија, моментално 7.198 круни (околу 960 евра), дополнителни пензии финансирани од работодавачите и приватни заштеди.

Ашурнија вели дека зголемувањето на старосната граница е неизбежно ако се сака да се одржи социјалниот систем.

– Како што населението старее, а животниот век расте, ако сакаме да ги задржиме истите јавни услуги, мораме да обезбедиме стабилни јавни финансии – посочува тој.

Сепак, го критикува автоматското зголемување на границата на секои пет години, кое може да доведе до пензионирање на 74 години до 2070 година.

Ерик Симонсен, заменик-претседател на Конфедерацијата на данските работодавачи, смета дека тоа е единствениот одржлив пат.