40 години затвор за Македонецот Виктор Драгомански – завршува крвавиот судски процес за двојно убиство во Малта!

Македонскиот државјанин Виктор Драгомански е осуден на 40 години затвор за неговата улога во двојно убиство и грабеж што се случија во Малта, во случај кој со месеци ја потресуваше тамошната јавност. Неговиот соучесник, албанскиот државјанин Даниел Мука, доби доживотна казна затвор со дополнителни шест казни на изолација.

фото:принтскрин/4news

Пресудата ја изрече судијката Наташа Галеа Шиберас, откако поротата на 28 јуни ги прогласи обвинетите за виновни за бруталното убиство на доктор Крис Пандолфино и неговиот партнер Ивор Мацејовски. Жртвите беа убиени во својот дом, а делото било проследено со тешка кражба и други поврзани кривични дела.

Драгомански беше осуден за тешка кражба со последица убиство и за користење лажни регистарски таблички, додека Мука беше обвинет и осуден за директно извршување на убиствата.

Во истиот случај, Данецот Јеспер Кристиансен беше осуден на 40 години затвор уште во февруари 2024 година.

Судењето траеше вкупно 12 дена, а поротата одлучуваше речиси пет часа пред да ја донесе конечната пресуда. Обвинителството беше застапувано од др. Марија Франческа Спитери и др. Кевин Валета, додека одбраната на Драгомански ја водеа др. Жозе Ерера и др. Алекс Сери Ерера.

Случајот доби силно медиумско внимание и предизвика бурни реакции во јавноста, поради бруталноста на делото и фактот што инволвираните лица доаѓаат од различни земји, што му даде меѓународна димензија на целиот процес.

БОНУС ВИДЕО: