ЈОРГОС МАЗОНАКИС ХОСПИТАЛИЗИРАН ВО ПСИХИЈАТРИСКА УСТАНОВА: Пејачот тврди дека е присилно и без негова согласност

foto/The Greek Herald

Јоргос Мазонакис, познатиот грчки пејач со три децении кариера и голема популарност во Грција и Европа, завршил во психијатриска установа, што веднаш предизвикало реакции од неговите адвокати. Пејачот тврди дека хоспитализацијата е „присилна“ и дека зад сè стои неговото семејство.

Мазонакис, кој започнал да настапува на сцената во 1993 година, бил приведен и префрлен во психијатриска клиника без негово знаење и согласност, по пријава од семејството со кое долго време не е во добри односи.

„Моето привремено затворање во јавна психијатриска установа е извршено без мое знаење и без моја согласност. Одеднаш, утрово, враќајќи се дома по утринското пливање, ме дочека непријатно изненадување – патролен автомобил на грчката полиција кој ме замоли, по налог на обвинител, да бидам префрлен во јавна психијатриска установа на преглед“, изјавил Мазонакис.

Според законот, семејството може да поднесе барање до обвинител за психијатриска хоспитализација доколку смета дека лицето страда од ментално нарушување, што ја објаснува постапката на привремен пренос во јавна психијатриска установа.

Во 2021 година, Мазонакис отворено зборувал за неговото искуство во воената служба, кога бил сместен во 414-та воена психијатриска болница во Пентели, објаснувајќи ја својата агорафобија и тешкотиите со кои се соочил во таа институција.

Последните шест години, пејачот имал отворен конфликт со родителите, опишувајќи ја „грчката фамилија како благослов и како проклетство“. Неговите најблиски преку адвокати му одзеле дел од заработените пари од пеење и инвестициски активности, што дополнително ја комплицира ситуацијата околу неговата хоспитализација.