ПРВИОТ 100% ЕФИКАСЕН ЛЕК ЗА ПРЕВЕНЦИЈА ОД ХИВ ОДОБРЕН ДА СЕ ШИРИ ГЛОБАЛНО

foto/Africa CDC

Американската Агенција за храна и лекови (FDA) го одобри ленакапавир, комерцијално познат како Yeztugo, првиот светски лек за превенција од ХИВ што се прима две пати годишно преку инјекција — историски чекор во борбата против вирусот.

Препаратот е речиси 100% ефикасен во спречување на сексуално пренесен ХИВ кај возрасни и адолесценти со тежина над 35 кг. Во клиничките испитувања не биле регистрирани ниту еден случај на инфекција кај жени, и само два случаи од 2.179 учесници мажи и лица од различен родов идентитет.

Оваа иновација претставува голем напредок во однос на досегашните опции како дневните таблети (Трувада) или инјекции секој месец или на два месеца (каботегравир). Со само две дози годишно, значително се намалува потребата од чести посети на клиника, се намалува стигмата, и се подобрува придржувањето кон терапијата.

Светската здравствена организација веќе ја поддржа употребата на ленакапавир, а има и глобална иницијатива за широка достапност, особено во земјите со низок приход.

Компанијата Gilead Sciences, производителот на лекот, најави дека ќе дозволи производство на генерички верзии во 120 држави и се здружи со Глобалниот фонд за борба против СИДА, туберкулоза и маларија со цел да допре до 2 милиони луѓе во наредните три години.

Претседателот на Gilead, Даниел О’Деј, изјави:

„Овој договор се темели на заедничката желба што побргу да им помогнеме на што повеќе луѓе со ова медицинско достигнување.“

И покрај ветувањата, остануваат загрижености околу еднаквоста во пристапот и високата почетна цена на лекот, што би можело да го ограничи неговото влијание во сиромашните региони, и покрај меѓународните напори.