ТРАГЕДИЈА ВО СВЕТОТ НА „БАРБИ“: МАРИО ПАГЛИНО И ЏАНИ ГРОСИ ПОЧИНАА ВО СОБРАЌАЈНА НЕСРЕЌА ВО ИТАЛИЈА!

foto/people.com

Дизајнерите и колекционерите на кукли „Барби“, Марио Паглино и Џани Гроси, загинаа во тешка сообраќајна несреќа што се случи во неделата, 27 јули, на автопатот А4 меѓу Торино и Милано во северна Италија.

Автомобилот во кој патувале Паглино и Гроси се судрил челно со друго возило управувано од 82-годишниот Еџидио Черијано, кој по излегувањето од патарината се упатил во спротивна насока, влегувајќи во погрешна лента, соопшти италијанската новинска агенција „АНСА“.

Покрај Паглино и Гроси, трет патник во нивниот автомобил исто така го загуби животот, додека четвртиот е во критична состојба и се лекува во болница. Возачот Черијано, исто така, загина во овој судир.

По трагичната вест, производителот на кукли „Барби“, компанијата Мател, преку Инстаграм изрази длабока тага и почит кон Паглино и Гроси:
„Тимот на Барби е скршен од загубата на Марио Паглино и Џани Гроси, двајца ценети креатори и соработници на Мател кои донесоа радост и уметност во светот на Барби преку ‘Магија 2000’.“

Паглино, моден дизајнер, и Гроси, графички уметнички директор, ја основаа компанијата „Магија 2000“ во 1999 година. Тие во текот на годините блиско соработуваа со Мател, создавајќи многубројни кукли, фустани и специјални колекции за Барби.

„Како страсни и талентирани дизајнери и колекционери доживотно, нивниот дух и љубов кон брендот ја претворија секоја нивна креација во ремек-дело. Освен нивниот извонреден талент, тие носеа енергија што го осветлуваше секој простор во кој влегуваа“, истакна Мател покрај фотографија од двајцата покрај знакот на Барби.

Светот на модата и колекционерството тагува по загубата на двајцата талентирани уметници, чиј придонес остави неизбришлив белег во историјата на култниот бренд.