ХИРУРЗИТЕ УСПЕАА ДА ОЖИВЕАТ СРЦЕ КОЕ НЕ ЧУКАЛО А БИЛО ТРАНСПЛАНТИРАНО ВО БЕБЕ!

foto/NHS

Во историски потег што може да ја промени иднината на трансплантацијата кај новороденчињата, тим хирурзи од Универзитетот Дјук во САД успеа да оживее срце што не чукало повеќе од пет минути и да го пресади во тримесечно бебе – спасувајќи му го животот.

Хирурзите користеле специјално дизајниран апарат со центрифугална пумпа и оксигенатор, овозможувајќи таканаречена „реанимација на маса“ – постапка која не е возможна со стандардните машини за зачувување на органи, особено не кај срца со димензии на бебиња.

Шест месеци по операцијата, срцето функционира сосема нормално, без знаци на одбивање од телото на примателот – што претставува вистински подвиг во детската кардиохирургија.

Овој пробив носи голема надеж за стотици новороденчиња на листите за трансплантација, каде дури 20% умираат додека чекаат донаторско срце. Но, паралелно со воодушевувањето, се појавуваат и етички дилеми.

Методот користен при оваа операција се заснова на донирање по циркулаторна смрт (DCD), што отвора прашања за тоа што навистина претставува „смрт“, ако срцето може повторно да се оживее. Некои стручњаци ја доведуваат во прашање дефиницијата на смртта, додека други сметаат дека процедурата е етички прифатлива сѐ додека срцето се оживува надвор од телото.

Паралелно, тим од Универзитетот Вандербилт предложува алтернативна техника – зачувување на срцето без оживување, преку изолирање на протокот на крв и употреба на ладен, оксигениран раствор.

Двете револуционерни методи се објавени во најновото издание на престижниот New England Journal of Medicine, со потенцијал драстично да го зголемат бројот на достапни срца за трансплантација и да спасат илјадници детски животи низ светот.