Турскиот пејач Мустафа Сандал признал дека со години се бори со трихотиломанија – пореметување кое предизвикува неконтролирана потреба за чупање на сопствената коса.

„Додека размислувам, со прст поминувам преку главата и одеднаш си ја искинувам косата. За среќа, состојбата сега е значително подобрена“, изјавил Сандал за Hype Turkye.

Тој додал дека најголема поддршка му даваат мајка му и сопругата Мелис Сутшуруп, со која е во брак од 2022 година.

Мустафа Сандал е поранешен сопруг на балканската ѕвезда Емина Јаховиќ.

Што е трихотиломанија?

Трихотиломанија (анг. trichotillomania) е психолошко пореметување што се карактеризира со непреодолива потреба лицето да си ја чупа косата – од главата, веѓите, трепките или други делови од телото.

Порано се класифицираше како пореметување на контрола на импулсите, но денес често се вклучува и во спектарот на опсесивно-компулсивни пореметувања (ОКП).

Главни карактеристики:

• Повторувано чупање на влакна, што доведува до видливи ќелави места.

• Чувство на напнатост пред чинот или при обид да се избегне.

• Чувство на олеснување или задоволство по чинот.

• Срам, вина или тага поради сопственото однесување.

• Избегнување на социјални ситуации поради естетски последици.

Можни причини:

• Генетска предиспозиција,

• Хемиска нерамнотежа во мозокот (посебно серотонин и допамин),

• Стрес, анксиозност или траума.

Лекување:

• Психотерапија – особено когнитивно-бихевиорална терапија (КБТ),

• Медикаментозна терапија – антидепресиви или други лекови,

• Тренинг за замена на навики (habit reversal training) – свесност и контрола на импулсот.

Случајот на Сандал уште еднаш укажува на важноста од отворено зборување за менталното здравје – и кај јавни личности.