ПУТИН СЕРИОЗНО СЕ ЗАКАНУВА: „Ако Украина употреби валкана бомба…“

Фото: Vyacheslav Prokofyev / Sputnik / Profimedia

Рускиот претседател Владимир Путин изјави дека одговорот на Русија на употреба на валкана бомба од страна на Украина би бил катастрофален, изразувајќи надеж дека до тоа нема да дојде.

– Во нашата нуклеарна доктрина, и здравиот разум и практиката на нашите постапки секогаш велат дека секогаш одговараме на сите закани што се појавуваат, со иста мера. Затоа, нашиот одговор ќе биде многу остар и, најверојатно, катастрофален и за неонацистичкиот режим и, за жал, за самата Украина. Се надевам дека до тоа никогаш нема да дојде – изјави Путин за време на пленарната сесија на Меѓународниот економски форум во Санкт Петербург.

Санктпетербуршкиот меѓународен економски форум се одржува од 18 до 21 јуни.

Што е валкана бомба?
Валкана бомба, позната и како „радиолошки распрскувачки уред“, комбинира конвенционален експлозив со радиоактивен материјал, како на пример ураниум, пишува BBC. Кога експлодира, експлозивот ги распрскува радиоактивните честички во околината преку воздухот.

За разлика од нуклеарните бомби, валканите бомби не мора да содржат високо обогатен радиоактивен материјал. Наместо тоа, користат радиоактивни извори што можат да се најдат во болници, нуклеарни централи или истражувачки институти.

Поради тоа, тие се значително поедноставни и поевтини за изработка од класичното нуклеарно оружје. Исто така, поради нивните димензии и конструкција, може лесно да се транспортираат, на пример, во багажник на автомобил.